يعيش في قصر ضخم ولديه اسطول سيارات.. أسرار لا تعرفها عن سيف زاهر أغنى إعلامي رياضي في مصر

هل تعلم ان الاعلامي سيف زاهر عايش في قصر ملوش أول من آخر.. وعنده صف عربيات بملايين.. ولابس أغلى ساعة في العالم.. وعامل أوضة للهدوم أقل طقم فيها بـ 100 ألف جنيه.. وفاتح كذا معرض عربيات وموبايليا.. ومابيوفتش فرض.. وبيخاف جدًا من الحسد..

اسمه بالكامل سيف محمد سامح زكريا زاهر… اتولد في دمياط سنة 75.. ودخل كلية إعلام جامعة القاهرة.. والأسرة حالتها كانت معقولة.. ووالده كان عنده مطعم جوا نادي الصيد
وسيف كان شغال معاه في المطعم وعمره 14 سنة لكن أبوه كان طموح وفضل يشتغل على نفسه لحد ما بقى عضو مجلس إدارة النادي ومن بعده سيف كمان بقى عضو مجلس إدارة

وسيف متولدش في بؤه معلقة دهب وكان بيشتغل حاجات كتير جدًا في سن صغير.. لكن كان بيحب الكورة وبدأ يلعب في نادي دمياط وبعدين راح فترة صغيرة نادي الزمالك قبل ما يبطل ويشتغل في الإعلام..

بداية سيف في الإعلام كانت سنة 2008 على قناة الجزيرة وماكنش ليه علاقة بالكورة وكان بيقدم برنامج ساسي واجتماعي اسمه “الزاوية المعاكسة” وكان بيجيب ضيوف من العالم كله..

ومنها راح على قناة دي ام سي وعمل برنامج “أبو شمعة” وكان برنامج اجتماعي وبيعرض مشاكل الناس..

وبعدها راح قناة “ten sport ” وبدأ مسيرة الإعلام الرياضي من خلال برنامجه “في المرمى”..

لكن بدايته الحقيقية كانت على قناة “الحياة” وسيف كان شاطر ومجهتد وعمل شغل كويس جدًا لدرجة إنه وصل لراتب 7 مليون جنيه وده كان رقم كبير أوي وقتها..
وبعدها اشتغل في قناة أون سبورت وقدم برنامج “ملعب أون تايم”..

وسيف من أغنى إعلاميين الرياضة في مصر وعايش في قصر تمنه أكتر من 100 مليون جنيه وفيه شجر كتير وجيم وكل الحاجات اللي قلبك يحبها..

وعنده أكبر أوضة ملابس مليانة بدل بماركات عالمية وأقل واحدة فيهم تمنها ألفين دولار
وبيحب الساعات جدًا ورغم كده معندوش غير “ساعتين” من الدهب والألماظ وتمنهم آلاف الدولارات..
واحدة لابسها في إيده على طول والتانية دايما شايلها في الخزنة بتاعته..

ده غير إنه مبيلبسش الطقم غير مرة واحدة بس، رغم إنه اعترف إنه كان بيشتري هدوم بالقسط أيام الكحرتة..

ودلوقتي سيف مشارك في عدد كبير من معارض العربيات في القاهرة وعنده معارض موبيليا في طنطا بشراكة مع أخواته..

وسيف قال إنه حاليا مهتم جدًا بالبيزنس الخاص بتاعه ومش ناوي يشتغل في اتحاد الكورة تاني وأهم حاجة في حياته ولاده وشغله الخاص جنب شغله في الإعلام..

وعلى المستوى الأسري عنده ولد وبنت..
وتقريبا سيف نقل الجينات كلها لبنته لدرجة إنها هي كمان طلعت بتلعب كورة، لكن أهم حاجة علمهلهم هي إنهم يحافظوا على الصلاة ويبعدوا عن اي حاجة حرام..

وسيف قال إنه بيخاف من الحسد جدًا لكنه سايب كل حاجة على ربنا وأغلب وقته بيقضيه مع مراته وولاده..