الرئيس السيسي يصارح المصريين بحقيقة قطع الكهرباء..فماذا قال؟!

قال الرئيس عبدالفتاح السيسى، إن الدولة فى النهاية “موازنة”، مضيفا: “أنت النهارده مش عاوز تيجى تمس حاجة الغلبان عاوز تساعد من غير ما تؤذيه”.

وأضاف الرئيس السيسى، خلال افتتاح عدد من المشروعات التنموية بجنوب الوادي:” لو الرغيف النهارده بـ 3 أو 4 أو 5 جنيه، فيه ناس تقدر تشتريه، بس مش كل الناس تقدر تشترى كده، فلازم نكون متفهمين لأن الدولة فى النهاية موازنة وطاقتها المالية كده”.

ووجه الرئيس السيسى المسؤولين بالتحدث للرأى العام عن التحديات التى تواجه الدولة قائلا: “اتكلموا وقولوا الحكاية إيه للناس، قولوا ليه الكهرباء ليه مبتتعملش، ما تقولوا ليه؟ لو أخدت تمن الكهرباء الحقيقية هضاعف تمنها مرتين، طيب الغلبان هيروح منى فين؟ أقطع الكهرباء ولا أغلّيها؟ وأغلّيها قد إيه؟ اللى بيدفع جنيه هيدفع 2 و3، لو مواطن بيدفع 100 جنيه فى الشهر هاخد منه 300 جنيه طيب بنعمل إيه، بشرحها من باب إيه؟، أنا بتحمل المسؤولية أمام الله وقدامك علشان الكهرباء تستخدم 24 ساعة مفيش قطع كهرباء خالص لازم أخلى تمن الكهرباء قد تمنها مرتين 3 بقول تانى ليه مبزودش كده؟ علشان مديونية وزارة الكهرباء للبترول قد كده.. طيب اللى باخده أقل من التمن، وبالتالى أنا مديون لوزارة البترول.. أنا عندى مشكلة إنى أجيب البترول بالتمن ده وباقى الشركات اللى شغالة معانا ليها فلوس عندنا، طيب ده مديون وده مدين وده مش وليد النهارده ممارسات ماشين فيها بقالنا سنين، عملنا خطة فى 2016 علشان نخلى الحاجة على قد تمن تكلفتها لكن لازم تحطوا فى الاعتبار تحديات أزمة كورونا والأزمة العالمية والحروب اللى حوالينا وتأثيراتها علينا، الأمور مش ماشية كده يعنى ومواردنا مش كتير تسمح نقابل التحديات دى من غير جهد وتحمل لا”.

وواصل الرئيس السيسي: “واحنا بنعيب على المعنيين حتى فى التقارير الصحفية والمقالات اللى بتتكتب محدش بيتناول المسألة بشكل موضوعى خالص يا جماعة يا انتوا مش عارفين يا احنا مخبيين عليكم”.. بكلمكم بمنتهى الصراحة الدول لا تدار كده، وانما تدار بالجدية والمسؤولية والفهم ولو الناس فهمت هتيجى معاك وبقولك البديل أهو.. ممكن الكهرباء تشتغل 24 ساعة طبعا بس بكام؟.

وأكد الرئيس عبد الفتاح السيسى، أنه يتمنى أن تكون الجلسة القادمة للاحتفال بمشروعات الزراعة فى سيناء، متابعا: “الاستثمارات فى مجال الزراعة، الدولة مش مجال واحد تعليم وصحة وزراعة وصناعة، لما نيجى نتكلم عن دولة قوامها 106 ملايين، ده عاوز أعباء مالية ضخمة”.

وأضاف الرئيس السيسى فى نهاية كلمته فى افتتاح مشروعات تنموية جديدة فى جنوب الوادي: “إن شاء الله البنية الأساسية فى سيناء تكون خلصت لصالح 450 ألف فدان هناك، ومحطة بحر البقر صرف زراعى وننتج بها إنتاج يدخل فى الاقتصاد المصرى، وبشكر كل القائمين على المشروعات دى، وأتمنى لهم مزيدا من الجهد، ومحتاجين نتكلم مع الناس ولازم نتكلم، شكرا جزيلا”.

ووجه الرئيس عبد الفتاح السيسي الشكر إلي القائمين على مشروعات التنمية في جنوب الوادي وكل أجهزة الدولة المختلفة، متابعا: “كان ممكن نطلع المشوار.. التفاصيل كتير والتكلفة هتكون كتير.. ممكن نعمل رحلات لرجال الإعلام وشباب الجامعة يطلع يشوف الكلام ده على الأرض”.

وأضاف الرئيس السيسي، خلال كلمته في افتتاح مشروعات تنموية جديدة في جنوب الوادي: “مرة ثانية بشكر كل الجهات والقائمين على المشروع وبنقول لهم من فضلكم نستمر بمعدلات أكثر من كده.. كل فدان يدخل الخدمة يوفر إنتاج أكثر لصالحنا.. وبالتالي نصل إلى الحد الأقصى اللى ممكن الدولة توفره فيما أتاحه الله سبحانه وتعالي لينا”.

وتحدث الرئيس عبد الفتاح السيسى عن تكلفة رغيف الخبز، قائلا: “رغيف العيش بيتكلف جنيه وربع.. جنيه وربع.. أصل فيه ناس مش بتحب تتكلم.. ليه مش بتكلم وتقول.. هو عيب ولا حرام.. لا عيب ولا حرام”.

وأضاف الرئيس السيسي، خلال كلمته فى افتتاح مشروعات تنموية جديدة فى جنوب الوادي: “الرغيف أبو شلن بيتكلف جنيه وربع.. بعد ما كانت ميزانية الدولة تتكلف دعم لرغيف الخبز يصل إلى 20 – 30 مليار.. أصبح 120 – 130 مليار.. الرغيف أبو 5 صاغ ثمنه جنيه وربع.. بيكلفنى 130 مليار جنيه”.

وتحدث الرئيس عبد الفتاح السيسي عن إضافة الذرة إلى القمح، قائلا: “لما بنتكلم عن القمح المخلوط بالذرة.. مش بنغير كتير في المواصفات وبنقول حاجة معقولة.. مش بيغير في طعمه وشكله.. بتتكلم عن 20 % ذرة مع الفمح.. بنستخدم 18 مليون طن قمح.. وعلى كل حال مش كله بيتعمل عيش ومنتجات أخري.. لو قولنا العيش بنتكلم عن 10 – 12 مليون طن للخبز.. الـ 20 % منهم يعني 2 مليون طن ذرة”.

وأضاف الرئيس السيسي، خلال كلمته في افتتاح مشروعات تنموية جديدة في جنوب الوادي: “حتى الآن ومهما عملنا لا نستطيع توفير احتياجات القمح ونضطر نجيبه من بره.. ممكن اوي لتوقيت الزراعة الذرة يغطي جزء من القمح.. انا بقول لكم علشان انا رجل صريح.. لو انا اه اعمله.. 2 مليون طن قمح سعرهم يصل إلى 600 مليون دولار أو أكثر حسب سعر طن القمح.. وصل إلي أكثر من كده خلال الأزمة بالعام الماضي.. لو النهاردة اعمل هنا والتكلفة هيوفر 600 مليون دولار في الاستيراد.. ده موجود وده موجود”.

وقال الرئيس عبد الفتاح السيسي، إن الدولة المصرية شهدت زيادة سكنية منذ عام 2011 وحتى الآن تصل إلى 25 مليون نسمة، متسائلا: “يا تري الإنتاج الزراعي زاد ما يساوي الزيادة السكانية؟!”.

وأكد الرئيس عبد الفتاح السيسي، أن الدولة تجهز نفسها لتفادي أي أزمة، متسائلا: “هو أنا لازم استني الأزمة؟.. هو شغل البنية الأساسية كان ضروريا ولا كان زيادة.. ده كان ضروريا ودفعنا أرقاما ضخمة.. لو اتعملت على مدار 25 سنة كانت التكلفة أقل”.

وأضاف الرئيس السيسي، خلال كلمته في افتتاح مشروعات تنموية جديدة بجنوب الوادي الجديد: “المرة الجاية عاوزين نشوف سيناء ومستعدين نساعد كل مستثمر لخوض التجربة ومع نفسه.. احنا محتاجين ده.. محتاجين كل أيد مصرية كل خبرات وكل طاقة عمل وكل جهد مخلص يشتغل اللى نتجاوز فيه”.

وعلق الرئيس عبد الفتاح السيسي، على كلمة المهندس محمد جمال غريب رئيس مجلس إدارة شركة متخصصة فى الزراعة، وذلك خلال افتتاح مشروعات تنموية فى جنوب الوادى قائلا: “قصدت اتكلم معاك انت بالذات.. بسبب حاجتين المزرعة كانت بتقابل مشاكل وكل الجهود اللى اتعملت سابقا مش نجحت ولكن قدرت تحل المسألة بشكل حاسم.. وبتكلم عن نقطتين.. التكلفة كبيرة وبالتالى اقتصاديا كبيرة.. اقتصاديات المشروع لها عائد جيد .. مش هتعمل حاجة علشان الناس اللى شغالة فى المجال.. محتاج تعمل استثمارات كبيرة لكن العائد جيد”.

وأضاف الرئيس السيسي: “لما بنقول 25 إردب فى الفدان.. دى تجربتك.. لو كان السايد أن الفدان يطلع 18- 20 اردب بنفس كمية المياه والمساحة.. لما الكمية تزيد فوق الـ 20 إردب محتاج نتوقف عند ده.. فى الشغل اللى بيتعمل داخل مشروعات الخدمة الوطنية سواء هنا أو مستقبل مصر مش وصلنا 25 اردب للفدان.. الرقم ده نجح فى مساحة ألفين فدان والمتوسط 25 إردب يعنى فيه زيادة 5 إردب عن السايد.. لما نقول 5 إردب فى مليون فدان يبقى 2.5 مليون إردب يعنى مليون طن.. لو قسمنا ده على كمية هتطلع فوق 20 إردب.. هى هى المياه وهو هو الجهد..

وتابع الرئيس السيسي: “بقول التجربة مش علشان أهنئك وعلشان اسمع كل من يهتم المزارعين فى الدلتا والصعيد.. مهم اوى يعرفوا ازاى يوصل بالكمية دي.. والموضوع مش استخدام مكينة ولكن وسائل علمية تزود الكمية والإنتاج الكبير.. ولو قولنا مزرعة بنى سويف والمنيا وطبيعة الأرض قاسية شوية.. مهم اوى الناس بتقول الأرقام تكلفتها كتير اوي.. التكلفة كتير لأنك بتعمل كل حاجة مرة واحدة.. والدلتا اتعملت على 150 – 200 سنة.. سنين طويلة وانت بتعمل ده كله مرة واحدة.. المشروع بتدخل الكهرباء والمياه ومحطات الرفع.

وأكمل الرئيس السيسي: “لما بنيجى نعمل ده.. حق المشروع قبل حق بلدنا.. اننا نطلع أكبر حجم من الإنتاج.. مليون فدان بتطلع 2.5 مليون فدان.. يبقوا 3 ولا 3.5 مليون طن.. يبقى زودت كمية القمح من غير ما زود أرض أو مياه أو طاقة عمل.. هى نفس المساحة والوقت.. مليون طن هزود 200 ألف طن على نفس الكمية وبالتالى التجربة بتاعتك مهم اوى الحديث معها وأكيد وزارة الزراعة معنية بالكلام .. الرقم ده لافت نظري”.

ودعا الرئيس عبدالفتاح السيسي، المستثمرين للمشاركة في جميع المشروعات الزراعية التي تنفذها الدولة، مشددا على أهمية الحفاظ والاستفادة من اى كمية مياه وعدم اهدار أي نقطة مياه.

وأضاف الرئيس السيسي خلال افتتاح عدد من المشروعات التنموية بجنوب الوادي: عاوز بأقل كمية مياه أطلع أكبر إنتاج لمحاصيل وبالتالي لازم الاستفادة من حجم المياه الموجودة، مشيرا إلى إنشاء محطات المعالجة الزراعية مثل المحسمة وبحر البقر والدلتا الجديدة للحد من هدر المياه”.

وتحدث الرئيس عبد الفتاح السيسى عن كيفية الاستفادة من الأراضى الزراعية لتحقيق أقصى استفادة ممكنة، قائلا: “واحنا بنتكلم بنطرح طرح كلام.. لما نيجى ننزل على الأرض بنلاقى تفاصيل نتصدى لها.. لما بنتكلم عن 350 ألف فدان فى الصعيد يزرعوا قصب.. مش اقدر أقول للناس فى الصعيد مش تزرعوا قصب.. بنفس نصف كمية المياه نقدر نزرع بنجر.. صعب تقول للى زارع قصب وخدمته أقل لكن الكمية فين؟.. يقدر يزرع 700 ألف فدان بنفس كمية المياه”.

وأضاف الرئيس السيسي، خلال كلمته فى افتتاح مشروعات تنموية جديدة فى جنوب الوادي: “فيه فرق كبير بين طرح بالدراسات أو نقوم بإجراءات عملية لتنفيذ.. قولت الكلام من 4 سنين على موضوع القصب.. وبقول لنفسى هل غيرتوا؟.. انت مستنى لما مشكلة المياه تبقى مشكلة كبيرة وتضطر أنك تحرم من كمية المياه بنفس الحجم”.

وتابع الرئيس السيسي: “مش بحب اننا نتعامل مع الموضوع على أنه أزمة محتملة.. لازم اواجه واشتغل عليها لخد ما اخلصها.. كل الجهات المعنية والمزارعين.. القصب ده بياخد كميات انت مش حاسس بيها بتاخدها من نظم الري.. وعلى مستوى ما لدينا من مياه.. محتاجين اننا نزرع بنفس كمية المياه نزرع بنجر أو أى محاصيل أخري.. لو عاوز اطلع كمية المياه بتوع 350 ألف فدان.. او اعمل لها معالجة محطة صرف زراعي.. المحطة تتكلف مليارات والتشغيل يتكلف مليارات.. بقول الكلام ده احنا بنقعد فى الإعلام وحتى فى الجلسات لا نتكلم عن القضايا بتاعتنا وازاى تتحول إلى أفكار ونقنع الناس بيها.. 350 ألف فدان قمح.. مش بس كده الرى بالغمر.. مش بنظم رى حديثة فى محاولة للزراعة يبقى من الأول نحط كل النظم لاستخدام أقل حجم مياه من الإنتاج”.

وتحدث الرئيس عبد الفتاح السيسى خلال كلمته فى افتتاح مشروعات تنموية جديدة فى جنوب الوادى عن جهود الدولة فى مجال الزراعة وكيفية تحقيق الاستفادة الكبرى من الإنتاجية قائلا: “واحنا بنتكلم عن إجراء فى الزراعة بنتكلم عن 4 ملايين فدان.. بنقوله من الآبار واللواء توفيق عن عين داله.. طبيعة أرض وطبيعة مياه.. يتم اختيار الزراعة المناسبة مثل الجوجوبا.. كل مياه الصرف الزراعى .. النهاية المشاريع لما تطلع الإنتاج وتاخد بذور الجوجوبا.. وقود حيوى فى العالم وهتشغل ناس والعوائد مناسبة.. طب ما نعمل بقي”.