صرح أحمد حسام ميدو عبر برنامج دورينا غير على القناة السعودية تصريحات نارية تسببت في هجوم شديد عليه من جماهير الاهلي ، وجاءت كالتالي:
صدق او لا تصدق أنا راجل زملكاوي لكن أنا كراجل مصري وراجل محب للكرة المصرية كنت قاعد زعلان على اللي بيحصل في مباراة بالميراس جدا جدا
لان الموضوع اكبر بكتير من اهلي وزمالك أو نناكف بعض أو نكايد بعض .. الموضوع بالنسبالي أنه المفروض أن ده احسن فريق في مصر .. أن ده مفروض اللعيبه تقدم مردود افضل من كده بكتير حتى لو خسرت
إنما النهارده انا اسف اني أكون بتابع مباراة لفريق عنده تاريخ كبير زي الأهلي وكل اللعيبه في الملعب بلا إستثناء مش عارفين يعملوا أساسيات الكرة .. الاستلام والتسلم والوقوف في الكرة الثابتة والتحركات.. اساسيات الكرة مش عارف تعملها… ده بيخليني كرجل مصري ازعل واحزن للكرة المصرية وصلت ليه بكل صراحه
لما نادي فيه خمس ست لعيبه دولية في منتخب مصر على الأقل تيجي تلاعب لعيبه محترفه ويكون ده مستواك يبقى احنا لازم نراجع نفسنا في مصر احنا ليه وصلنا لكدة
وصلنا لكده لان الإعلام للاسف بيفخم ويتغنى بلعيبه محدودي الإمكانيات وبيظهروا قدام فرق أقل من المتواضعة في الدوري المصري بشكل جيد ما هو طبيعي يظهر كويس قدامهم لكن لما بتيجي تطلع بالليفل شويه .. المستوى الحقيقي بيبان فلازم نراجع نفسنا
الموضوع ملوش علاقه بالزمالك والأهلي والله .. لازم نراجع نفسنا وادوا كل لاعب حقه مش علشان لاعب راح نادي كبير أن أنا واجب عليا كإعلامي لما اطلع في الإعلام افخم فيه .. لا قيم كل لاعب حسب مستواه علشان مصلحة الكرة المصرية.
